ääm

E ütstaling

Weer fant huum di rous-stäär, wat heet friisk ma Europa tu douen än wat säit huum eentlik aw tjüsch tu „beflödje“? Önj e ütstaling foont Nordfriisk Futuur koon huum da hoodteeme foont Nordfriisk Instituut näier kånenliire. Filme, spräkeapnoome, modäle, teeme-ailönje, än maning keere, wat huum önjfååse koone, mååge et hiilj interaktiif. Sü koon huum önj en latj spal ütfine, hü önj Nordfraschlönj da noome ferdänj wörden, fäile, üt huk materijoole da üülje hüsinge baged wörden san, di ålste nordfrasche foone bewunre unti bai e karaooke-statjsoon ham seelew friisk snååken hiire. Uner da ouerschrafte „Vom Kommen und Gehen“, „Vom Nutzen und Trutzen“, „Vom Eigensein und Eigensinn“ än „Vom Alten zum Neuen“ foue da besäkere en gouen löke aw e nordfrasch histoori.

Et as en ütstaling, ouers niinj museeum. Et as en stää, weer huum iinjsen gou iinkiike koon am ham en lait frasch kultuur tu håålen, ouers uk en rüm, weer huum indüke koon än e tid ferjeese.  Dåt 360 grood panorama bil wiset en lait deerfoon, weer huum ham aw froie koon.

Nat tu waasen

E ütstaling as for åle manschne toocht, wat leese koone. Latjere bjarne fine maning keere tu önjfååsen, draien unti ütpreewen; da wåksene schönj ja deerbai stipe, ja wat forleese unti ferklååre.

Et ütstaling as ääm twasche moundi än fraidi foon e klook 8:30 bit 12:30 – sam deege uk långer, sü as wat et sekretarioot beseet as. Wan deer awfoorie wat oufmååged wörden as, koon huum ham e ütstaling uk di eeftermadi bekiike. Et fertrüt üs, ouers tut tids as et ai möölik tut waagiinje et Nordfriisk Futuur tu besäken.

We naame niinj intrees for e besäk önjt Nordfriisk Futuur, fröie üs ouers ouer en lait stipe.

Wan et sekretarioot beseet as, koone jam tu arks tid forbaikaame. Wan jam ma en gruteren floose kaame, wus et nat, wan we awfoorie beschiis füngen. Huum et Nordfriisk Futuur di eeftermadi besäke wal, schal ham aw arken fål önjmalde, deerma deer en termiin oufmååged wårde koon.

Fääringen döört Nordfriisk Futuur biitje we ai önj. E ütstaling ferklåård har foon seelew. Jü as sü apbaged, dåt huum foon iin teema tut ouder spränge koon. Enarken heet e möölikhäid sin äine interäse tu fülien. Kiik iinjsen in än lätj de foon statsjoon tu statsjoon driwe. Huum koon åliine unti tuhuupe ma oudere åle möölike elemänte ütpreewe än maenouder önjt snååk kaame.

En pädagogisch program biidje we ai önj. Jam koone ouers bai üs materiool for ferschälie ålersfloose füünj än deerma seelew en program ütårbe. Wan jam materiool önj en gruter tål brüke, dan wees sü gödj än mald jam awfoorie bai üs.

Jåå, et Nordfriisk Futuur koon uk foon manschne beseecht wårde, wat ai mör sü gödj tu fätjs san. Statsjoone, weer et wat tu hiiren än fäilen jeeft, san uk for persoone, wat ai sü gödj kiike koone, en belaawen.

Tiire mönje aw nån fål ma önjt Nordfriisk Futuur nümen wårde. Wan deer huum ouers aw en tiir (t. b. blinenhün) önjwised as, as dåt natörlik ai ferbin. Wees sü gödj än dou awfoorie önjt sekretaroot beschiis.